Մեկնաբանություններ Չկան

Ռեմարքեթինգ. Հետապնդում ենք մոռացկոտ հաճախորդներին

Ռեմարքեթինգը (remarketing) հաճախորդի վարքային թիրախավորման տեխնոլոգիա է, որի արդյունքում այն հաճախորդը, որը մտել է կայք, բայց անհրաժեշտ գործողությունը չի կատարել, տարբեր հարթակներում պարբերաբար հանդիպում է Ձեր կոնթեքստային գովազդին: Այսինքն, եթե հաճախորդը մեկ անգամ այցելում է Ձեր կայք, ապա հետագայում, որոշակի ժամանակահատված Դուք «հետապնդում» եք նրան՝ Ձեր գովազդը ներկայացնելով Google AdWords-ի կամ Yandex Direct-ի հետ համագործակցող բազմաթիվ հարթակներում:

Ռեմարքեթինգի արդյունավետ գործիքներ տալիս են Google AdWords-ն ու Yandex Direct-ը: Ռեմարքեթինգ եզրն օգտագործվում է Google AdWords-ի դեպքում, իսկ նմանատիպ նույն գործիքը Yandex Direct-ում կոչվում է ռեթարգեթինգ (retargeting):

Քանի որ այս գործիքը ստեղծվել է 3-4 տարի առաջ, ապա ռեթարգեթինգը ոչ այդքան հայտնի գործիքներից է, հատկապես Հայաստանում, որտեղ գրեթե չի օգտագործվում Google AdWords-ն ու Yandex Direct-ն՝ ընդհանրապես:

Ռեթարգեթինգ օգնում է մեծացնել Ձեր բրենդի արժեքը, քանի որ հաճախորդը մեկ անգամ Ձեր օնլայն ռեսուրս այցելելուց հետո պարբերաբար տարբեր տեղեր տեսնում է Ձեր մասին և նրա մոտ տպավորություն է ստեղծվում, թե գործ ունի մեծ գովազդային բյուջեով հայտնի ընկերության հետ: Արդյունքում, Ձեր բրենդը ամուր տպավորվում է նրա մոտ:

Ռեմարքեթինգով աշխատելը մի քանի առավելություններ է տալիս.

1. Լսարանի ընտրություն: Ռեթարգեթինգի շրջանակներում հնարավոր է նշել, թե ում եք ցանկանում ցուցադրել Ձեր առաջարկը, վաճառող տեքստը: Օրինակ, միայն այն հաճախորդներին, ովքեր Ձեր կայքում ապրանքը տեղադրել են զամբյուղ, բայց չեն գնել, միայն այն հաճախորդներին, ովքեր դիտել են ապրանքի տեսականին կամ միայն նրանց, ովքեր ուսումնասիրել են պրոդուկտի գինը: Նման մանրամասն թիրախավորումը թույլատրում է բարձրացնել ռեմարքեթինգի արդյունավետությունը:

2. Մասշտաբայնության ընտրություն: Ռեթարգեթինգ պլանավորելիս հնարավոր է որոշել, թե օրը քանի անգամ է երևալու Ձեր գովազդը հաճախորդի էկրանին, քանի օր, քանի շաբաթ կամ ամիս եք ցուցադրելու նրան առաջարկը, թե ինչ կայքերում է երևալու գովազդը և այլն:

3. Շահավետ գնային քաղաքականություն: Ռեթարգեթինգն ունի արդյունավետ գնային քաղաքականություն, որովհետև գումար վերցնում է ոչ թե ցուցադրությունից, այլ քլիքից: Այսինքն, հենց հաճախորդը սեղմելով հղմանը հայտնվում է Ձեր կայքում, այդ պահին նոր գումար եք վճարում: Իսկ ցուցադրությունների համար, որոնք նույնպես բրենդի ճանաչելիության տեսանկյունից օգտակար են, վճարելու կարիք չկա:

4. Բարձր արդյունավետություն: Քանի որ գովազդը ներկայացվում է միայն այն մարդկանց, ովքեր արդեն ինչ-որ կերպ պրոդուկտի կամ ծառայության մասին հետաքրքրվել են, այսինքն «տաք» հաճախորդ են, հետևաբար արդյունավետությունն էլ մեծ է:

5. Բրենդի ճանաչելիության մեծացում: Քանի որ մեկ անգամ կայք մտնողն այնուհետև պարբերաբար տեսնում է Ձեր հայտարարությունը, ապա Ձեր կազմակերպության լոգոն ճանաչելի է դառնում և տպավորություն է ստեղծվում, թե մեծ գովազդային բյուջեով ընկերություն եք, որն իր հայտարարությունները տեղադրում է բազմաթիվ կայքերում:

Ռեմերքեթինգը հարմար գործիք է հատկապես փոքր ու միջին բիզնեսների համար, ովքեր գովազդի համար նախատեսված մեծ բյուջեներ չունեն, իսկ ռեթարգեթինգի միջոցով կարողանում են ներկայանալ միայն այն հաճախորդներին, որոնք հետաքրքրություն են ցուցաբերել կոնկրետ որևէ պրոդուկտի նկատմամբ:

Ռեթարգեթինգային գովազդային արշավ կազմակերպելիս անհրաժեշտ է հիշել մի քանի սկզբունք, որոնց պահպանելը արդյունավետության բարձրացման համար շատ կարևոր է:

· Լսարանի ճիշտ սեգմենտավորում: Ռեթարգեթինգի թիրախային լսարանին անհրաժեշտ է սեգմենտավորել ոչ թե ըստ ռեսուրսների (թե ինչ կայքերում երևա Ձեր գավազդը), այլ ըստ հաճախորդի գործողությունների (թե Ձեր կայքում ինչ գործողություններ կատարած հաճախորդերին ցուցադրվի գովազդային առաջարկը): Սեգմենտավորման արդյունավետությունը բարձրանում է նաև այն դեպքում, երբ ռեթարգեթինգը գործում է CRM համակարգի հետ: Օրինակ` ցուցադրում է գովազդ այն հաճախորդներին, ովքեր արդեն մեկ ամիս է որևէ գնում չեն արել Ձեր կայքից: Նման սեգմենտավորումը նաև թույլ կտա վերականգնել հին հաճախորդներին, մեծացնել լոյալությունը:

· Չհոգնեցնել հաճախորդներին չափից շատ ցուցադրվող գովազդով:Ռեթարգեթինգից հաճախորդների հիմնական դժգոհությունը հոգնեցնող գովազդն է, հետևաբար այդ հարցում անհրաժեշտ է սահմանափակումներ դնել: Օրինակ, դադարել գովազդ ցուցադրել այն անձանց, ովքեր արդեն գնում են հղումով կամ չցուցադրել Ձեր գովազդը մեկ ամսից ավելի:

· Ռեթարգեթինգով չներկայացնել միայն բրենդը: Այն հաճախորդը, որը մտել է Ձեր կայք, արդեն գիտի, ճանաչում է Ձեր բրենդը, և ռեթարգեթինգով նորից բրենդը ներկայացնելու իմաստ չկա: Ավելի արդյունավետ է կոնկրետ գործողության կոչ անել կամ կոնկրետ առաջարկ անել:

Վերջերս, 2013 թվականին Google-ն ավելացրեց ռեմարքեթինգի ևս մեկ գործիք` դինամիկ ռեմարքեթինգ (dynamic remarketing), որը թույլ է տալիս զանգվածային գովազդն ամեն հաճախորդին ներկայացնել անհատական մոտեցմամբ: Դինամիկ ռեմարքեթինգի դեպքում հաճախորդին կոնկրետ գործողությանը համապատասխան հայտարարություն է ցուցադրվում: Օրինակ, եթե հաճախորդը ապրանք է տեղադրել զամբյուղ, և առանց գնումների դուրս է եկել կայքից, ապա դինամիկ ռեմարքեթինգի միջոցով նրան հիշեցնում եք զամբյուղի ապրանքի մասին: Դինամիկ ռեմարքեթինգը հնարավորություն է տալիս անհատական մոտեցում ցուցաբերել հաճախորդներին, օրինակ, արդեն գնումներ կատարած հաճախորդին առաջարկել աքսեսուարների վաճառք, հիշեցնել հաճախորդին հետաքրքրող պրոդուկտի թեմայով ակցիաների, նորությունների մասին և այլն:

Վահրամ Միրաքյան

Facebook Comments

Մեկնաբանություն

Լավագույն մարքեթինգային հոդվածները
Ձեր էլ․հասցեին
Ձեր տեղեկատվությունը երբեք չի տրամադրվի երրորդ անձի: