Comments are off for this post

Վաճառող տեսանյութ կամ վիդեո-մարքեթինգ

2015-Video_Marketing_698888825Վաճառող տեսանյութը գովազդային այլ տեսանյութերից տարբերվում է նրանով, որ վաճառող տեսանյութի գլխավոր խնդիրը դիտորդին կոնկրետ գործողության դրդելը, վաճառելն է: Գովազդային տեսանյութերը կարող են լինել իմիջային, ուշադրություն գրավող, ծանոթացնող և այլն, բայց վաճառող տեսանյութի գլխավոր ֆունկցիան վաճառելն է:

Տեսանյութերի միջոցով մարքեթինգային քաղաքականությունը կարող է շատ արդյունավետ լինել, քանի որ տեսանյութն ազդում է մարդու բոլոր զգայարանների վրա` վիզուալ, լսողական, վերբալ: Բացի այդ, տեղեկատվական ծանրաբեռնվածության պայմաններում մարդուն ավելի հեշտ է տեսանյութ դիտել, քան տեքստեր կարդալ: Այդ պատճառով վիդեո-մարքեթինգը գնալով ավելի մեծ նշանակություն է ձեռք բերում:

Վիդեոմարքեթինգը կիրառական է 99 տոկոս բիզնեսների դեպքում:

Վաճառող տեսանյութերն ըստ ոճերի բաժանվում են մի քանի մասի.

Տեսանյութ պրոդուկտի մասին: Այս դեպքում տեսանյութը նվիրվում է կոնկրետ պրոդուկտի` շուկային հետաքրքրող առավելությունների վրա, ներկայացվում է, թե ինչ խնդիրներ կարող է լուծել պրոդուկտն ու խնդիրները լուծելու տեսանկյունից ինչ առավելություններ ունի այն:

Վիդեո-զեկույց: Ծառայության, ապրանքի, արտադրական պրոցեսի կամ բիզնես պրոցեսի մասին վիդեոզեկույց հաճախորդներին, որպեսզի պարզ լինի ոչ միայն պրոդուկտի հետ կապված ինֆորմացիան, այլև պրոդուկտի կամ ծառայության մասին պրոցեսները: Վիդեոզեկույցն օգնում է մեծացնել պրոդուկտի մասին ճանաչելիությունը «ներսից»:

Կորպորատիվ ֆիլմ: Այս ժանրի ֆիլմերը խնդիր ունեն ներկայացնել կազմակերպությունն ամբողջությամբ, բրենդի և ընկերության մասին համապատասխան պատկերացումներ ձևավորելու համար:

— Կրթական ֆիլմ: Կրթական ֆիլմի բովանդակությունը (կոնտենտը) մարքեթինգի ոլորտից է և խնդիր ունի կրթական նյութ տրամադրելու միջոցով, ենթատեքստում ներկայացնել պրոդուկտն ու վերաբերմունք ձևավորել պրոդուկտի վերաբերյալ:

Հաճախորդների հարցումներ: Պրոդուկտից կամ ծառայությունից օգտվող հաճախորդների տպավորությունների հարցումն ու հարցումների համառոտ տեսանյութերի տարածումը կարող է լոյալություն առաջացնել թիրախային լսարանի մոտ, հատկապես, եթե հարցմանը մասնակցում են ոչ թե 10, 20, այլ 100 կամ 500 հոգի: Եթե 500 Ձեր հաճախորդներից հարցնեք իրենց տպավորությունը Ձեր պրոդուկտից ու տեղադրեք համացանցում (ասենք մեկ տարվա ընթացքում) ապա ժամանակի ընթացքում լսարանի մոտ տպավորություն կձևավորվի, որ հասարակության մեծամասնությունն օգտվում են Ձեր պրոդուկտից: ggTaxi-ի դեպքում հաջողությամբ օգտագործում է հաճախորդների վիդեոհարցման տեխնոլոգիան: Ի դեպ, հարցումների հարցում կարևոր է, որ հաճախորդները դրականից բացի խոսեն նաև թերությունների մասին, ինչը օբյեկտիվության տպավորություն կստեղծի:

Մարդկային պատմություններ: Էմոցիոնալ և հետաքրքիր մարդկային պատմությունները միշտ մեծ արձագանք ու տարածում են գտնում սոցիալական ցանցերի լսարանի մոտ:

filesՎաճառող տեսանյութն ունի մի շարք բնութագրիչներ, որոնք մարքեթինգային այս գործիքն առանձնացնում են մնացածներից: Մասնավորապես.

· Վաճառող տեսանյութը հնարավորություն է տալիս պրոդուկտի ամենակարևոր, ամենահետաքրքիր, ամենագրավիչ հատվածները համառոտ ներկայացնել լսարանին,

· Վաճառող տեսանյութը կարող է վառ ու առանձնահատուկ լինել, ինչի արդյունքում դիտողի մոտ կտպավորվի ու երկար կմնա հիշողության մեջ,

· Վաճառող տեսանյութը մեկ հաղորդագրություն (message), մեկ իմաստ փոխանցող համառոտ, հետաքրքիր և հասկանալի նյութ է,

· Վաճառող տեսանյութը Ձեր «չհոգնող վաճառողն» է, քանի որ համացանցում հայտնվելուց հետո շատ երկար ժամանակ կարող է վաճառել` դեպի իրեն ուղղորդած լսարանին հաճախորդ դարձնելով,

· Թույլ է տալիս պոտենցիալ հաճախորդներին իրենց համար առավել հեշտ ճանապարհով իմանալ Ձեր ընկերության կամ ապրանքի մասին,

· Վիդեո-մարքեիթնգն օգնում է ավելի արագ կառուցել բրենդն ու իմիջ ձևավորել:

Վաճառող տեսանյութի տեխնիկական բնութագրիչները

Կան որոշակի տեխնիկական առանձնահատկություններ, որոնք մեծացնում են վաճառող տեսանյութի արդյունավետությունը: Այդ տեխնիկական բնութագրիչներն են.

· Տեսանյութի տևողությունը չպետք է գերազանցի 2-3 րոպեն: Եթե կարողանում եք տեղավորվել մինչև մեկ րոպեի սահմաններում`ավելի լավ: Տեղեկատվական գերծանրաբեռնվածության պայմաններում երկար տեսանյութեր նայելը դժվար է: Բացառություն կարող են լինել կրթական տեսանյութերը, որոնց երկարությունն անհրաժեշտ է կոմպեսացնել դինամիկայով:

· Անհրաժեշտ է ունենալ գրավիչ երաժշտական ֆոն: Հաջող ընտրված երաժշտական ֆոնը կարող է օգնել լսարանին, որ շարունակեն դիտել մինչև վերջ:

· Դինամիկ սցենար: Վաճառող տեսանյութի կադրերն ու իմաստային բլոկը պետք է դինամիկ կառուցվածք ունենան, այլ պարագայում լսարանին կարող են հոգնեցնել:

· Վիզուալ առաջնային կադրի հետևի ֆոնը չպետք է ուշադրություն գրավի: Հետևի ֆոնին շատ մանր դետալներ չպետք է լինեն, որպեսզի դիտորդի ուշադրությունը չշեղեն գլխավոր սյուժեից:

· Վաճառող տեսանյութը պետք է ունենա նաև վաճառող տեքստ կամ ինչպես ընդունված է ասել` վիդեո-քոփիրայթինգ: Առանց վաճառող տեքստի վիդեոմարքեթինգի նշանակությունը թուլանում է:

Վաճառող տեսանյութի սցենարի առանձնահատկությունները

Սցենարի բովանդակությունը պետք է կառուցված լինի ոչ թե Ձեր պրոդուկտի յուրահատկությունների, այլ այն խնդրի վրա, որի լուծման համար նախատեսված է Ձեր պրոդուկտը: Սցենարը ցանկալի է կառուցել վաճառքի գլխավոր սկզբունքով` վաճառել խնդրի լուծումը, ոչ թե պրոդուկտը:

Վաճառող տեսանյութի սկզբի 5 վայրկյաններն ամենակարևորն են, այս ընթացքում անհրաժեշտ է գրավել լսարանի ուշադրությունը: Գրավելու համար ցանկալի է սկիզբը կառուցել հետևյալ տրամաբանությամբ` «լուծիր այսինչ խնդիրն այսինչ պրոդուկտի միոջոցով»: Օրինակ` manu.am-ի վաճառող տեսանյութի առաջին հինգ վայրկյաններին ասվում է` «քաղցած եք, menu.am, սիրված ուտեստների առաքում ավելի քան 250 ռոստորաններից…»: Եթե խնդիրը հետաքրքրում է դիտողին, ապա նա կշարունակի նայել մինչև վերջ: Առաջին 5 վայրկյանում գրավելը կարևոր է նաև նրա համար, որովհետև Youtube-ում վիդեոգովազդ պատվիրելիս առաջին հինգ վայրկյանը պարտադիր է, հետո դիտողը կարող է անջատել գովազդը: Եթե 5 վայրկյանում մեր ասելիքը չհասցնենք, պոտենցիալ հաճախորդին չհետաքրքրենք` գովազդն արդյունավետ չի լինի:

Հաջող սկզբից հետո անհրաժեշտ է ուշադրությունը կենտրոնացնել գրավիչ փաստի վրա: Մանրամասն ներկայացնել խնդիրն ու խնդրի լուծման Ձեր տարբերակները: Menu.am-ի տեսահոլովակում գրավիչ փաստի դերում 250 ռեստորանների մասին տեղեկատվությունն է: Հետո կարելի է շարունակել ու ներկայացնել պրոդուկտից օգտվելու դեպքում հասանելի առավելությունների, պրոդուկտի առանձնահատուկ օգտակարության ու ակցիաների մասին:

Վերջում գործողության կոչի հերթն է (call to action): Խնդիրը մանրամասն ներկայացնելուց հետո, երբ դիտորդն արդեն հասկանում է, որ իր ու Ձեր նկարագրած խնդիրները նույնն են` նշվում է Ձեր ընկերության անվանումն ու գործողության կոչ է արվում, միաժամանակ ներկայացվում է ընկերության լոգոն ու հետագա կապվելու տվյալները: Գործողության կոչը պետք է հստակ ու հասկանալի լինի` «ներբեռնել հավելվածը», «գրանցվել զանգի համար», «պատվիրել այսինչ համարով» և այլն:

Կարևոր է, որ բոլոր գործողությունները պարզ ու հասկանալի լինեն, իսկ խնդրի լուծման ճանապարհը հնարավորինս կարճ` մեկից մինչև չորս քայլ: Պարզության տեսանկյունից «մեկ տեսանյութ, մեկ խնդրի լուծում» սկզբունքն անհրաժեշտ է միշտ պահել: Եթե Ձեր պրոդուկտը մի քանի խնդիրներ է լուծում, ավելի լավ է մի քանի տեսանյութ պատրաստել, քանի մեկը ծանրաբեռնել ու երկարացնել:

Ինչպես տարածել վաճառող տեսանյութը

Վաճառող տեսանյութը պատրաստելուց հետո կարող եք տեղադրել կայքում, եթե կայքում առկա է տեսանյութերի հատված: Տեսանյութը կարելի է տեղադրել youtube.com-ում և հետո լսարանին բերել միանգամից YouTube: Քանի որ Հայաստանում մեծ է Facebook-ի ազդեցությունը, ապա Facebook ներբեռնած տեսանյութերը նույնպես մեծ տարածում կարող են ունենալ, հատկապես, որ YouTube-ի տեսանյութերը Facebook -ում ավելի թույլ տեսանելություն ունեն, քան Facebook ներբեռնած տեսանյութերն են:

Վահրամ Միրաքյան

Facebook Comments

Comments are closed.

Լավագույն մարքեթինգային հոդվածները
Ձեր էլ․հասցեին
Ձեր տեղեկատվությունը երբեք չի տրամադրվի երրորդ անձի: